أتمرن إزاي وإمتي في رمضان !!!

سؤال كتير مننا بيسأله سواء كان بيروح الجيم أو بيلعب رياضة معينة زي السباحة او الاسكواش أو أي رياضة تانية.

دكتور/ أحمد مصطفى:
أتمرن ازاي وإمتي في رمضان !!!
سؤال كتير مننا بيسأله سواء كان بيروح الجيم أو بيلعب رياضة معينة زي السباحة أو الاسكواش أو أي رياضة تانية.
طيب خلينا الاول نوضح حاجة مهمة جدا وهي إن العضلة تقريبا 75 % منها مياه والصيام لساعات طويلة بيخلي الجسم في حالة جفاف ومن المعروف بالنسبة للعضلات علميا أن فقد العضلات للمياه بيؤدي لانخفاض كفاءة العضلة وقدرتها التدريبية بنسبة 25 % علي الاقل وبالتالي يبقي وصلنا ان التدريب وقت الصيام مش هيكون أحسن اختيار لأنه حيسبب جفاف زيادة أكتر للعضلة وكفاءة أقل وممكن كمان يزود احتمال إصابات العضلات.
طيب نعمل إيه و نتمرن إمتي !!!
أتمرن بعد الافطار عشان أقدر أشرب مياه وأقلل جفاف العضلة وبالتالي تحافظ علي كفاءة التدريب وهنا بيكون قدامي حلين.
الأول .. اخد حاجة خفيفة خالص زي تمر وممكن شوية شوفان وممكن موز وممكن بطاطا عشان تبقي وجبة خفيفة واتمرن بعدها علي طول وبعدين ارجع اخد الافطار بتاعي.
الثاني .. اخد فطاري عادي وأستني بعدها مش أقل من ساعتين ونصف الى ثلاثة ساعات وبعدين أنزل اتمرن وبرضو أحافظ على شرب المياه بمعدل كل 20 دقيقة تدريب اخد حوالي 200 الي 250 مللي مياه.
طيب الظروف متسمحش اني اتمرن غير وأنا صايم قبل الإفطار يبقي لازم أعمل حسابي ان كفاءة العضلة عندي اقل فبالتالي لازم اقلل شدة التمرين بتاعتي جدا
تاني حاجة اتمرن في الساعة الأخيرة قبل الافطار عشان بعدها مباشرة اقدر اغذي جسمي بالعناصر اللي فقدها واللي محتاجها بسرعة بعد التمرين سواء زي المياه أو البروتين او النشويات أو الأملاح المعدنية.
واللي لازم نعرفه إن التمرين الصبح بعيد جدا عن ساعة الافطار مش محبب خالص مع الصيام لأني حفضل مخلي العضلة في حالة جفاف وكمان تحت ضغط معدلات هدم عالية لمدة طويلة و ده هحيضر بكفاءة وأداء العضلة ويخليني أخسر من الكتلة العضلية بشكل كبير والخسارة العضلية دي بتزيد كل ما بزود شدة التمرين وانا صائم يبقي لازم دائما افتكر إني لو اضطريت اتمرن قبل الإفطار إني أخفف شدة التمرين.

قد يعجبك ايضا